ប្រឡងបាក់ឌុបថ្ងៃទី១ ! បេក្ខជន បេក្ខនារី២១នាក់មានបញ្ហាសុខភាព ក្នុងនោះ២នាក់មិនអាចប្រឡងបាន

ប្រឡងបាក់ឌុបថ្ងៃទី១ ! បេក្ខជន បេក្ខនារី១ ៤៩៧នាក់អវត្តមាន និង២១នាក់មានបញ្ហាសុខភាព
ក្នុងនោះ២នាក់មិនអាចប្រឡងបាន សម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់ថ្ងៃទី១ គឺថ្ងៃទី២១ ខែសីហា ឆ្នាំ២០១៧នេះនៅទូទាំងប្រទេសបានបញ្ចប់ដោយដំណើរការល្អ ខណៈមានបេក្ខជន បេក្ខនារីចំនួន១ ៤៩៧នាក់អវត្តមាន ដែលភាគច្រើនជាសិស្សបំពេញវិជ្ជា (ស្វ័យរិន) និងបេក្ខជន បេក្ខនារីចូលរួមប្រឡងចំនួន២១នាក់មានបញ្ហាសុខភាព ក្នុងនោះមានចំនួន២នាក់មិនអាចបន្តការប្រឡងបាន ដោយសារមានអាការៈធ្ងន់ធ្ងរ ។ ដំណើរការប្រឡងបាក់ឌុបឆ្នាំ២០១៧នេះ ដែលរៀបចំដោយក្រសួងអប់រំ យុវជន និងកីឡា សហការជាមួយសហភាពសហព័ន្ធយុវជនកម្ពុជា និងអង្គភាពប្រឆាំងអំពើពុករលួយ (ACU) នឹងប្រព្រឹត្តទៅរយៈពេល០២ថ្ងៃ គឺថ្ងៃទី២១-២២ ខែសីហា ឆ្នាំ២០១៧ ដោយមានបេក្ខជន បេក្ខនារីក្នុងបញ្ជីឈ្មោះប្រឡងចំនួន១០១ ៤១០នាក់ (ស្រី៥០ ០៤៩នាក់) បែងចែកជា១៧៩មណ្ឌល ស្មើនឹង៤ ០៩៣បន្ទប់នៅទូទាំងប្រទេស ។ចំពោះវិញ្ញាសាដែលនៅសល់សម្រាប់ប្រឡងនៅថ្ងៃទីស្អែកទី២២ ខែសីហា ឆ្នាំ២០១៧ដែលជាថ្ងៃបញ្ចប់នៃការប្រឡងគឺ ៖ ១-ថ្នាក់វិទ្យាសាស្ត្រ ៖ អក្សរសាស្ត្រខ្មែរ (៩០នាទី) រូបវិទ្យា (៩០នាទី) និងគណិតវិទ្យា (១៥០នាទី) ២-ថ្នាក់វិទ្យាសាស្ត្រសង្គម ៖ គណិតវិទ្យា (៩០នាទី) សីលធម៌-ពលរដ្ឋវិទ្យា (៩០នាទី) និងអក្សរសាស្ត្រខ្មែរ (១៥០នាទី) ។